Kəlbəcər rayonu Cənubi Qafqazın ən böyük iqtisadi potensiala malik olan bölgələrindəndir. Bu barədə 25 noyabr tarixində öz Facebook səhifəsində millət vəkili Vüqar Bayramov rayonun işğaldan azad edilməsinin il dönümü ilə bağlı paylaşımda məlumat verib.
Onun sözlərinə görə, Azərbaycanın ən böyük qızıl yataqları Kəlbəcər rayonunun payına düşür. Söyüdlü yatağının qızıl ehtiyatları 115 tondan çox, Ağduzdağ və Tutxun yataqlarının ehtiyatları isə 15 tona yaxın qiymətləndirilir. Əlavə olaraq Ağyataq, Levçay, Çorbulaq, Qamışlı və Ağqaya yataqlarında bir min tondan artıq civə ehtiyatları mövcuddur. Həmçinin rayonun mərmər oniksi, nefroid ehtiyatları daxil bir sıra faydalı ehtiyatlara malik yataqları var.
Millət vəkili rayonun ərazisinin böyüklüyünü qeyd edərək kənd təsərrüfatının potensialı, həmçinin qış, yay, müalicəvi, tarixi və dini turizm imkanları barədə də öz fikrini bildirib.
Vüqar Bayramovun dediyinə görə, işğal müddətində rayona ən azı 10 milyard dollar ziyan dəyib və böyük turizm potensialı Kəlbəcərdə qısa zamanda iqtisadi aktivliyi bərpa etməyə imkan verəcək.
