Yanvar ayında paytaxtda bir neçə tədbirlərin, o cümlədən konsertlərin, teatrlarda tamaşaların, baletlərin və digər perfomansların keçirilməsi nəzərdə tutulur. İnsanoid bu ay baş tutacaq tədbirlərin siyahısını təqdim edir.
Yanvarın 9-dək Bakı Dövlət Sirkində “Yeni il Macərası” keçiriləcək. Proqram çərçivəsində hava gimnastları, ekstravaqant qanqsterlər, atçılıq şouları və 3D heyvanlarından ultra müasir holoqram şousu nümayiş olunacaq. Biletlərin qiyməti 11 - 27 manat arasındadır.
Yanvarın 12-də "Leyli və Məcnun", ayın 16-da isə "Romeo və Cülyetta" baletləri Opera və Balet Teatrının səhnəsində qoyulacaq. Biletlərin qiyməti 16 manat təşkil edir.
Rəşid Behbudov adına Dövlət Mahnı Teatrında iki gün dalbadal uşaqlar üçün «Soyuq Ürək» interaktiv musiqili tamaşa göstəriləcək. Bu tədbir yanvarın 15-də rus dilində, 16-da isə azərbaycan dilində baş tutacaq. Biletlərin qiyməti yerlərdən asılı olaraq 10 - 25 manat arasında dəyişir.
12-14 yanvar tarixlərində saat 20:00-da Heydər Əliyev Sarayında “BIG BAND” konserti keçiriləcək. Konsertdə Xalq Artisti Eyyub Yaqubov, Azərbaycan Dövlət Televiziyasının solisti Fuad Musayev və solist Natəvan Cəbizadə iştirak edəcəklər. Biletləri 20 - 100 manata almaq mümkündür.
Yanvarın 19-da Dövlət Akademik Musiqili Teatrında Samir Qulamovun eyniadlı pyesi əsasında "Bir nəfəs qədər" tamaşası təşkil olunacaq. Tamaşa şəhidlərə, qazilərə, əsgərlərə və oğlunu itirmiş analara həsr olunub. Biletlər 6 - 10 manatdır.
Akademik Rus Dram Teatrında yanvarın 21-i “Yeddi Gözəl”, ayın 29-u isə “Əli və Nino” səhnəyə qoyulacaq. Saat 19:00-da başlayacaq tədbir rus dilində keçiriləcək. Biletləri 15 manata əldə etmək olar.
Bu ayın sonunda, yanvarın 29-da türk komediyaçısı Hasan Can Kaya ilk dəfə Bakıda “Stand UP Party” şousu ilə azərbaycanlı sevənləri ilə görüşəcək. Tədbir Bakı Konqres Mərkəzində saat 20:00-da baş tutacaq. Biletlərin qiyməti 30 - 300 manat civarındadır.
Adıçəkilən tədbirlərdə iştirak etmək üçün biletləri iticket.az saytından əldə etmək olar.
