Məlum olduğu kimi, ötən həftə Dövlət Təhlükəsizliyi Xidməti (DTX) Qax rayonunda əməliyyat keçirib. Əməliyyat zamanı Qax Rayon İcra Hakimiyyətinin başçısı Musa Şəkiliyev saxlanılıb. Korrupsiya əməllərində ittiham olunan başçı barəsində həbs qətimkan tədbiri seçilib.
2019-cu ildən indiyədək Azərbaycanda həbs edilən icra başçılarının əksəriyyəti eyni ittihamla saxlanılıb və həbs olunublar.
Bizim.Media vəzifəsini yerinə yetirərkən tutduğu nöqsanlara görə məhkumluq həyatı yaşayan icra başçılarının siyahısını təqdim edir.
Qoca Səmədov
2019-cu ildə Yevlax rayonunun sabiq icra başçısı Qoca Səmədov vəzifə səlahiyyətlərindən sui-istifadə etmə, külli miqdarda təkrar rüşvət alma, mənimsəmə və digər faktlara görə saxlanılıb. Törətdiyi cinayət əməllərinə görə, 7 il 3 ay həbs cəzasına məhkum edilən sabiq başçının səhhəti nəzərə alınaraq həbs müddəti 6 ilə endirilib. Həbsdə olarkən 3 dəfə əməliyyat olunan, 2023-cü ildə şərti azadlığa buraxılan Qoca Səmədov həmin ilin dekabrında vəfat edib.
Nizaməddin Quliyev
Elə həmin il Dövlət Təhlükəsizlik Xidməti əməkdaşları tərəfindən rüşvət alarkən cinayət başında yaxalanan Ağstafa rayonunun keçmiş icra başçısı Nizaməddin Quliyevdə həbsdə olarkən vəfat edən icra başçılarındandır. 9 il müddətində azadlıqdan məhrum edilən eks-icra başçısı 2021-ci ildə koronavirusdan ölüb. O, 10 il Gədəbəy Rayon İcra Hakimiyyətinə başçılıq edəndən sonra elə saxlanıldığı il Ağstafa rayonuna icra başçısı təyin olunmuşdu.
İcra başçılarının həbsi 2020-ci ildə də davam edib. Həmin ilin fevralında Neftçalanın, mayda isə Biləsuvarın və İmişlinin, ardından Kürdəmir, Cəlilabad rayonlarının da başçıları həbs olunub.
İsmayıl Vəliyev
Neftçalanın sabiq və həbsdə olan icra başçısıİsmayıl Vəliyev Lənkəran Ağır Cinayətlər Məhkəməsinin hökmü ilə 10 il müddətində azadlıqdan məhrum edilib. Onun cəzası kassasiya şikayəti əsasında 6 il 2 aya endirilib. Qeyd edək ki, o, 2005-ci ildən Qobustan, 2011-ci il tarixdən 20 fevral 2020-ci ilədək Neftçala RİH-nin başçısı vəzifəsində çalışıb.
Mahir Quliyev
Biləsuvar Rayon İcra Hakimiyyətinin həbsdə olan keçmiş başçısı Mahir Quliyev 2020-ci il aprelin 30-da vəzifəsindən azad edilib. 2006-cı ildən 2011-ci ilədək Astara, 2011-ci ildən Biləsuvar Rayon İcra Hakimiyyətinin başçısı olan Mahir Quliyev mənimsəmə, vəzifə səlahiyyətlərindən sui-istifadə etmə, təkrar rüşvət alma və vəzifə saxtakarlığında ittiham olunub. 11 il həbs cəzası alsa da, Ali Məhkəmə eks-icra başçısının şikayətini qismən təmin edərək cəzanı 8 il 3 aya qədər azaldıb.
Vilyam Hacıyev
İmişli rayonunun sabiq icra başçısı Vilyam Hacıyev də 2020-ci ildə DTX tərəfindən saxlanılan və sonradan cəzası azaldılan icra başçılarındandır. 16 il icra başçısı olmuş Vilyam Hacıyev 2004-2006-cı illərdə Göygöl, 2006-2012-ci illərdə Samuxun, 2020-ci ilə qədər isə İmişlinin icra başçısı vəzifəsində çalışıb. Milyonlarla manat büdcə vəsaitinin yeyintisində ittiham olunan sabiq icra başçısına 12 il həbs cəzası verilsə də, Ali Məhkəmə cəzanı 8 il 6 aya endirib.
Ceyhun Cəfərov
Həbs edilən icra başçıları arasında cəzasını bütövlükdə çəkərək azadlığa çıxan icra başçıları da var. Bu 2020-ci ildə saxlanılan Kürdəmir Rayon İcra Hakimiyyətinin sabiq başçısı Ceyhun Cəfərovdur. Məhkəmənin hökmü ilə ona 8 il 6 ay müddətində həbs cəzası verilsə də, bu müddət iki dəfə azaldılıb. Əvvəl 6, sonradan isə Ali Məhkəmənin qərarı ilə onun cəzası 4 il 6 aya qədər azaldılıb. Bu ilin fevralında korrupsiya ittihamları ilə məhkum edilmiş Ceyhun Cəfərovun azadlığa çıxıb.
Namiq Zeynalov
2020-ci ildə saxlanılan Cəlilabad Rayon İcra Hakimiyyətinin sabiq başçısı Namiq Zeynalova 12 il həbs cəzası verilib. 2023-cü ildə onun cəza müddəti 11 il 9 aya endirilib. Namiq Zeynalov 5 milyon manatdan artıq vəsaiti mənimsəmə və rüşvət alma yolu ilə ələ keçirməkdə ittiham olunub.
İcra başçılarının həbs dalğası 2021-ci ildə də davam edib.
Alimpaşa Məmmədov
Həmin il Şəmkir rayonunun sabiq icra başçısı Alimpaşa Məmmədov həbs edilib. Ona 11 il 6 ay həbs cəzası verilib, Ddaha sonra onun cəzası 10 ilə endirilib. O, mənimsəmə, cinayət yolu ilə əldə edilmiş pul vəsaitlərini leqallaşdırma, vəzifə səlahiyyətlərindən sui-istifadə, təkrar, külli miqdarda rüşvət alma itiihamı ilə həbs edilib.
