Kürdəmirdə kürəkənlə qayınana arasında dava olub.
İnsanoid.com-un verdiyi məlumata görə, hadisənin istintaqı Kürdəmir Rayon Məhkəməsində aparılıb.
Belə ki, təqsirləndirilən Zeynəb Səfərova (ad şərtidir) 1969-cu ildə Biləsuvar rayonunda anadan olub. Ötən ilin sentyabrında aralarında yaranmış münaqişə zamanı kürəkəni Sabir Əliyevi (ad şərtidir) dəmir parçası və bel sapı ilə döyüb. Münaqişəyə səbəb kürəkəninin gəlib arvadını evinə aparmaması olub.
Nəticədə Zeynəb Səfərova CM-nin 128-ci (qəsdən sağlamlığa zərbə vurma) maddəsi ilə təqsirləndirilib.
Təqsirləndirilən Zeynəb Səfərova məhkəmə iclasında verdiyi ifadədə özünü təqsirli bilmədiyini deyib:
“Sentyabrın 8-i qızım Aygün kürəkənim Sabirlə bizim evə qonaq gəldi. Sabir həmin gün öz evlərinə qayıtsa da, qızım bizdə qaldı. Qızım bir neçə gün bizdə qaldıqdan sonra onu öz evinə apardım. Qapıdan içəri girəndə Aygün ərindən “niyə görə gəlib onu aparmadığını” soruşdu. Bu vaxt Sabirin anası bizi söyərək, üstümüzə hücum etdi. Əlindəki çanta ilə Aygünün üzünə zərbə endirdikdən sonra oğlu ilə birləşib bizi döydülər.
Qudam Sevda turşu bankası ilə qızımın başına vurdu. Oğlu qırıq şüşələrlə Aygünün qolunu kəsdi. Mənim haqqımda deyilənlərin hamısı şər, böhtandır. Mən Sabiri döyməmişəm”.
Daha sonra məhkəmədə zərərçəkmiş Sabir Əliyev ifadə verib:
“Aygünlə telefon vasitəsi ilə tanış olub, evlənmişik. Sentyabrın 8-i Biləsuvar şəhərində yaşayan qayınanamgilə qonaq getdik. Axşam mən evə qayıtsam da, həyat yoldaşım anasıgildə qaldı. Bir neçə gün sonra Aygün anası Zeynəblə Kürdəmirdəki evimizə gəldi. Onlar evə girən kimi arvadım sinəmdən itələyib, onu evə aparmaq üçün niyə gəlmədiyimi soruşdu. Daha sonra içəri daxil olub evin şüşələrini əli ilə vuraraq sındırdı. Anası Zeynəb də mənim anamı söyməyə başladı. Aygün anamın üstünə cumaraq boğazından tutub, yerə yıxdı. Qayınanam da turşu bankasını götürüb öz başına vurdu. Ardınca bankanın qırılmış şüşələrini götürüb anamı vurmaq istədi.
Anam kömək üçün çölə qaçarkən Zeynəb xala dəmir parçasını götürüb başıma bir dəfə vurdu. Daha sonra da bel sapı ilə döyməyə başladı”.
Hər iki tərəfin ifadəsindən sonra Zeynəb Səfərova təqsirli bilinib. Məhkəmənin qərarı ilə o, 6 ay müddətində azadlıqdan məhrum edilib.
Fidan İlqar
