Laçında 32 ildən sonra ilk dəfə “Bilik Günü” qeyd olunacaq. Bu barədə 7 sentyabr tarixində Report məlumat yayıb.
Sentyabrın 15-də Laçın rayon 2 nömrəli tam orta məktəbdə ilk zəng çalınacaq.
Tədbirdə elm və təhsil naziri Emin Əmrullayev, Prezidentin Laçın rayonunda xüsusi nümayəndəsi Məsim Məmmədov, müəllimlər, ictimaiyyət nümayəndələri, rayon sakinləri iştirak edəcəklər.
510 şagird yerlik Laçın rayon 2 nömrəli tam orta məktəbin üçmərtəbəli binasının sahəsi 4 550 kvadratmetrdir. Binada 24 yerlik doqquz, 18 yerlik beş və 12 yerlik dörd sinif otağı, 1 informatika, 1 texnologiya kabineti, 3 laboratoriya, 18 yerlik məktəbəhazırlıq otağı və 24 yerlik hərbi hazırlıq kabineti var.
Daha sonra isə Laçın rayonu Zabux kənd tam orta məktəbində ilk dərs günü münasibətilə tədbir olacaq.
Bundan əlavə, sentyabrın 14-də Şuşa şəhər 1 nömrəli məktəblə tanışlıq olacaq.
Qeyd edək ki, Laçında sonuncu dəfə 1991-ci ilin sentyabrında 1991-1992-ci dərs ilinin başlaması münasibətilə “Bilik Günü” keçirilib.
