Azərbaycanda bir çox banklar müştərilərinə kredit kartları təklif edir və onların hər birinin öz şərti və tələbləri var. Bəs ən sərfəli kredit kartı hansıdır? Bununla bağlı İnsanoid araşdırma aparıb.
Kapital Bank - Birkart
Birkartın 4 növü var. Kartlarla təklif olunan kredit məbləği 300 -10 000 manat arasında dəyişir. Kartın güzəşt müddəti 40 gündür. Əgər ay ərzində kartdan edilən alış-verişin məbləği 500 manatdan az olarsa, aylıq xidmət haqqı kart növündən asılı olaraq 1-3 manat təşkil edir. Müştəri kartdakı pulu nağdlaşdırmaq istəyərsə, bu zaman o yalnız ümumi məbləğin 50-60%-ni çıxara bilər. Nağdlaşdırılmış məbləğin ödənilməsində gecikmə yaranarsa, kredit faizi illik 25% təşkil edir. Cashback 1,5%-dən başlayır.
Kartı əldə etmək üçün son iş yerindən 6 ay staj tələb olunur. Əməkhaqqı kartı Kapital Bankdan olarsa 3 aylıq staj kifayət edir.
Azərbaycan Beynəlxalq Bankı - Tamkart
Tamkartla təklif olunan kredit məbləği 300 - 15 000 manat təşkil edir. Bu kartda güzəşt müddəti 60 gündür. Bankın təklif etdiyi kartların qiyməti 0 - 300 manat civarında dəyişir. Ödəniş birdəfəlik olur və sonradan aylıq xidmət haqqı tutulmur. İstifadəçi kartdan pulu çıxartmaq istəyərsə yalnız 50%-ni nağdlaşdıra bilər. Kart növündən asılı olaraq illik fazi dərəcəsi 18-24%-dir. Beynəlxalq Bankın kredit kartlarında isə cashback 1-40% arasında dəyişir.
Müştərinin əməkhaqqısı bu bankdan olarsa 3 ay, digər banklardan olarsa 6 ay staj tələbi var. Əməkhaqqısını Beynəlxalq Bankdan almayan, lakin dövlət müəssisəsində çalışan şəxslər üçün də staj tələbi 3 aydır.
Bank of Baku - Bolkart
Bolkart vasitəsilə verilən məbləğ 200 -10 000 manatdır. Bank of Baku müştərilərinə 40-45 gün güzəşt müddəti təklif edir. Kartların qiyməti növündən asılı olaraq 0-150 manat arasında dəyişir. İllik xidmət haqqı isə 20-40 manatdır. Nağdlaşdırma limiti 50-100% təşkil edir. İllik faiz dərəcəsi 25%-dir. Sözügedən kartlarda cashback 0,3% - 45% civarındadır.
Təhsil, tibb və dövlət müəssisələrində çalışanlar üçün minimum əməkhaqqı tələbi 210 manat, təqaüdçülər üçün 200 manatdır. Kart üçün müraciət edənlərdən 6 ay staj tələb olunub.
Unibank - Albalı
Unibank müştərilərinə Albalı kartı vasitəsilə 10 000 manatadək kredit təklif edir. Kartdan istifadə olunan məbləğ 40 gün ərzində faizsiz geri qaytarıla bilər. Kartlar pulsuz verilir və illik xidmət haqqı mövcud deyil. Albalı kartında nağdlaşdırma limiti yoxdur, istifadəçi məbləğin 100%-ni kartdan çıxara bilər. İllik faiz dərəcəsi 25% təşkil edir, cashback isə 30%-dəkdir.
Əməkhaqqı tələbi fərdi təhlil əsasında kredit mütəxəssisləri tərəfindən təyin olunur. Staj tələbi 6 aydır.
Yapı Kredi Bank - Worldkart
Bu bankın təklif etdiyi kredit kartı ilə verilən məbləğ 300 manatdan başlayır. Güzəşt müddəti isə 30 gün təşkil edir. Kartın qiymətləri 10-70 manat arasında dəyişir. Nağdlaşdırma limiti isə kartın növündən asılı olaraq 50%-100% civarındadır. Gecikmə faizi illik 40% müəyyənləşib. Bu kartlarda cashback mövcud deyil, lakin kartı partnyor şəbəkələrdə istifadə etdikdə ballar toplanılır. Kredit kartı üçün müraciət edən müştərilərin minimum əməkhaqları 250 manat olmalıdır. Staj tələbi minimum 1 ildir, əməkhaqqı kartı Yapı Kredi Bankdan olarsa 6 ay kifayət edir.
Kredit kartı əldə etmək üçün yaş həddi bankdan asılı olaraq dəyişir. Bütün banklarda minimum yaş 18-dən başlayır. Maksimum yaş həddi isə 65-67-dir.
[gallery columns="1" link="file" size="full" ids="18980"]
