Azərbaycanda videokonfransların təşkili üçün "Zoom"un iş prinsipi ilə fəaliyyət göstərən pulsuz veb-platforma (meet.yer.cloud) yaradılıb. Bunu dekabrın 27-də APA-ya layihə rəhbəri Rəşad Əliyev deyib.
O qeyd edib ki, platformanın fərqli cəhəti ondan ibarətdir ki, onlayn konfransların bütün məlumat bazası xaricdə deyil, ölkə daxilində saxlanılır.
“Videokonfransa qeyri-məhdud sayda iştirakçı qatıla bilər. Bütün proseslər veb-platforma üzərində qurulduğu üçün əlavə proqramın quraşdırılması tələb olunmur", - deyə R.Əliyev vurğulayıb.
