Statistik rəqəmlərə əsasən, Azərbaycan məktəblərində qız uşaqlarının sayı hələ də azalmaqdadır. Bu haqda noyabrın 29-da Sputnik Azərbaycan məqalə dərc edib.
Dövlət İmtahan Mərkəzinin (DİM) sədri Məleykə Abbaszadə regionlarda 9-cu sinifdən sonra orta təhsildə qızların sayında kəskin azalma olduğunu vurğulayıb. Bu erkən nikah və ya qızların təhsildən uzaq tutulması tendensiyalarından xəbər verir. Onun sözlərinə görə, 9-cu siniflər üzrə buraxılış imtahanında iştirak edən şagirdlərin 54%-ni oğlanlar, qızlar isə 46%-ni təşkil edib. 11-ci siniflər üzrə buraxılış imtahanında isə iştirak edənlərin 45,7%-i qız olub.
Milli Məclisin Ailə, qadın və uşaq məsələləri komitəsinin rəsmisi Aynur Veysəlovanın dediyinə görə, məktəblərdə cins nisbətinin dəyişməsinin bir neçə səbəbi var.
“Hazırda oğlan şagirdlərin sayının qızlardan çox olmasının bir səbəbi doğum zamanı oğlan uşaqlarına üstünlüyün verilməsidir. Bu da imtahanlarda qızların sayına təsir göstərir”, - deyə ekspert açıqlayıb.
O, həmçinin məktəblərin yerləşməsinin qızların təhsildən kənar qalmasına səbəb olduğunu bildirir. A. Veysəlovanın sözlərinə əsasən, bəzi kəndlərdə yalnız ibtidai təhsil var və təhlükəsizlik baxımından qızların başqa kəndlərdə oxumaqlarına icazə verilmir.
DİM-in hesabatı 2020-ci il ərzində bəzi rayonlarda 9 və 11-ci siniflər üzrə qızların təhsildə iştirakının aşağı olduğunu təsdiqləyir. Ən aşağı göstərici Şamaxıda, ən yüksək isə Yevlaxda qeydə alınıb.
