Külli miqdarda mənimsəmədə təqsirləndirilən Nəsimi rayonu Mənzil Kommunal Təsərrüfat Birliyininn 14 saylı Mənzil İstismar Sahəsinin sabiq rəisi və 2 mühasibinin cinayət işinin materialları Bakı Ağır Cinayətlər Məhkəməsinə göndərilib. Bu haqda dekabrın 30-da APA məlumat yayıb.
Onlar haqqında “mənimsəmə və ya israf etmə təkrar, şəxs tərəfindən öz qulluq mövqeyindən istifadə etməklə, xeyli miqdarda ziyan vurmaqla törədildikdə” və “vəzifə səlahiyyətlərindən sui-istifadə” maddələri ilə cinayət işi başlanıb.
Mənzil İstismar Sahəsinin sabiq rəisi 2018-2021-ci illər ərzində rəhbərlik etdiyi qurumda müxtəlif əməkdaşların işə gəlmədikləri halda sonuncuların maaş kartlarındakı ümumilikdə 23 min 449 manat pul vəsaitini ələ keçirməsinə əsaslı şübhələr müəyyən edilib.
2 mühasib isə 10 min 873 manat məbləğində pul vəsaitini mənimsəməkdə şübhəli bilinirlər.
