Ötən il Azərbaycan Mərkəzi Bankı (AMB) dövriyyədən 7 milyard manat mədaxil edib, 7,4 milyard manatlıq və yaxud 474,6 milyon ədəd pul nişanını isə məxaric edib. Bu barədə 5 may tarixində Report Azərbaycan Mərkəzi Bankına istinadən məlumat verib.
Məlumata əsasən, 2,7 milyard manat yararsız pul nişanlarının tədavüldən çıxarılması təmin edilib. Bildirilib ki, il ərzində 358 ədəd (28 min manat) saxta pul nişanı aşkarlanaraq tədavüldən çıxarılıb. Daxili İşlər Nazirliyi “saxta pul və qiymətli kağızlar hazırlama, əldə etmə və ya satma” maddəsilə 6 cinayət işi açaraq istintaq aparıb.
Qeyd olunub ki, Bakıda yeni “Nağd pul ofisi” yaradılıb, bütün nağd pul ofisləri ilə əhalidən 8 milyon manat pul nişanı qəbul edilərək dəyişdirilib.
