Son günlər spirt zəhərlənməsi ilə bağlı məlumatlar yayılıb. Bu gün Bakıda daha bir nəfər texniki spirtdən zəhərlənərək ölüb. Bununla da paytaxtda bu səbəbdən ölənlərin sayı 22-yə çatıb.
Xatırladaq ki, fevralın 22-23-də Sabunçu rayonu ərazisində ümumilikdə 15 nəfərin ölməsi faktı ilə bağlı Sabunçu Rayon Prokurorluğunda cinayət işi başlanaraq ibtidai istintaq aparılır. Baş Prokurorluğun yaydığı məlumata görə, 15 nəfərin zəhərlənərək öldüyü yerdən aşkar edilən gigiyenik vasitələrin və etil spirtinin satış nöqtələrindən də nümunələr götürülməklə tərkibi yoxlanılarkən gigiyenik vasitənin (spirt) tərkibində insan həyatı və sağlamlığı üçün təhlükəli olan metil spirti aşkar edilib.
Bəs, görəsən, belə hadisələrin qarşısını necə almaq mümkündür?
Mövzu ilə bağlı Bakuplus.az-a açıqlama verən Kliniki Tibbi Mərkəzin (KTM) baş toksikoloqu Azər Maqsudovun sözlərinə görə, qış mövsümü başlayandan spirtli içkilərdən zəhərlənmə halları artıb:
“Əsasən də metil spirtindən zəhərlənənlər daha çoxdur. Bununla bağlı tez-tez müraciətlər olur. Etil spirti ilə metil arasında fərqlər var. Kimyəvi düsturu müxtəlifdir. Metil spirti texnoloji prosesdə də çox ucuz əmələ gəlir. Satış qiyməti də çox ucuz, 60-80 qəpikdir. Amma buna baxmayaraq etil spirti texnoloji prosesdə bahadır. Araq və viski içkisi kimi qiyməti də yüksəkdir. Ona görə də maliyyə məsələsinə görə bəzi şəxslər daha ucuz spirtə üz tutur”.
A.Maqsudov zəhərlənmə simptomlarını sadalayıb:
“Əsas şikayətlər baş ağrısı, başgicəllənmə, ürək bulantısı, qusma, ikili görmə və yuxululuqdur. Bu yuxululuq elədir ki, getdikcə xəstə komaya düşə bilər. Komadan çox çətinliklə çıxarmaq olur”.
Toksikoloq metil spirtindən zəhərlənənlərin statistikasını da açıqlayıb:
“Statistikaya görə metil spirti ilə zəhərlənmələrin 85 faizi ölüm ilə nəticələnir. Metil spirti özü də apteklərdə satılır. Dezinfeksiya üçün bir maddədir. Üstündə də texniki spirt sözü yazılır”.
“Qış mövsümündə bədənin müqaviməti zəiflədiyi üçün spirtli içki qəbul etmək məsləhət deyil. Fəsadı çoxdur. Həssas olan insanlar mütləq diqqətli olub, bu məsələləri nəzərə almalıdır. Aptekdən alınan metil spirti daxilə qəbul edildikdə ümumiyyətlə çox təhlükəlidir. Adamın həyatına son qoya bilər”, – deyə A.Maqsudov fikrini tamamlayıb.
Nəzrin Vahid
