2021-ci ildə Azərbaycanda ÜDM-in artım tempi proqnozlardan yüksək olub. Bu barədə 23 dekabr tarixində iqtisadiyyat naziri Mikayıl Cabbarova istinadən Report xəbər yayıb.
Nazirin sözlərinə görə, Azərbaycanda ÜDM-in artım tempi 2021-ci ilin sonu üçün 3,4% həcmində proqnozlaşdırılsa da, Beynəlxalq Maliyyə Təşkilatları buna skeptik yanaşırdı. Sözügedən təşkilatlar artım tempinin 1,7% səviyyəsində olmasını proqnozlaşdırırdılar: “Lakin 11 ayın yekununda Azərbaycanda ÜDM-in artım tempi 5,3% səviyyəsində qeydə alınıb ki, bu göstərici bizim öz proqnozlarımızdan yuxarıdır. Qeyri-neft sektorunda bu artım tempi daha da yüksək olub - 6,4%".
Nazirin dediyinə görə, artımda əsas rolu vergi güzəştləri, investisiya təşviqi sənədi, ölkənin müxtəlif bölgələrində sənaye parklarının yaradılması, biznes mühiti, lisenziyalaşdırılmanın sadələşdirilməsi oynayıb. Nazir əlavə edib ki, cari ildə qeyri-neft sənayesində 20%-dən çox artım qeydə alınıb, qeyri-neft ixracı isə 44% artıb. İlin sonuna kimi 2,6 milyard dollar həcmində qeyri-neft ixracı nəzərdə tutulur: “Müstəqiliyimiz dövründə qeyri-neft ixracı 1,9 milyard ABŞ dollarından yuxarı olmayıb”, - deyə Mikayıl Cabbarov əlavə edib.
