Qarabağ bölgəsində çoxsaylı filiz, qeyri-filiz, inşaat və tikinti materialları, içməli, mineral-termal su yataqları aşkarlanıb. Bu barədə dekabrın 14-də ekologiya və təbii sərvətlər naziri Muxtar Babayev məlumat verib.
Aşkar edilən su yataqlarından 167-si Mineral Xammal Bazasına daxil edilib. Nazir qeyd edib ki, həmin yataqlarda respublikanın daxili istehlak bazarını təmin edəcək və xarici bazarlara çıxarılacaq müxtəlif növ mineral-xammal ehtiyatlar mövcuddur.
Muxtar Babayev işğaldan azad olunmuş bölgələrdə geoloji-kəşfiyyat işlərinin davam etdiyini bildirib: “Bu baxımdan işğaldan azad edilmiş ərazilərimizin yerli və xarici investisiyalar cəlb edilməklə ölkə iqtisadiyyatına reinteqrasiyası və burada iqtisadi fəallığın təmin olunması mühüm əhəmiyyət kəsb edir”.
