Həbs edilmiş Neftçala rayon İcra Hakimiyyətinin sabiq başçısı İsmayıl Vəliyevin əmlakları müsadirə olunub. Bu barədə aprelin 15-də APA məlumat verib.
Müsadirə edilmiş əmlakların siyahısı:
- Səbail rayonu, Mətbuat prospektində mənzil;
- Gəncə şəhəri, Nizami rayonunda fərdi ev;
- Bakının Yasamal rayonunda qeyri-yaşayış sahəsi;
- Yasamal rayonu, Qurban Xəlilov küçəsində ikimərtəbəli mənzil və 6 otaqlı mənzil;
- Qobustan rayonu, Xilmilli kəndində əmlak kompleksi müəssisəsi (Xırman binası);
- Qobustan rayonu, Mərəzə qəsəbəsində 1 mərtəbəli qeyri-yaşayış binası;
- “Neftçala Taxıl” ASC-nin xüsusi mülkiyyətində olan müəssisə;
- Neftçala şəhəri, M.Ə.Sabir küçəsində “Yurdum” adlı ictimai-iaşə obyekti və torpaq sahəsi.
Neftçalanın sabiq icra başçısı ötən il fevralda rüşvət alarkən Dövlət Təhlükəsizliyi Xidməti tərəfindən saxlanılıb. O, “vəzifə səlahiyyətlərindən sui-istifadə etmə”, “külli miqdarda təkrar rüşvət alma” və “mənimsəmə” maddələrilə ittiham olunub.
İsmayıl Vəliyev oktyabrın 29-da 10 il müddətinə azadlıqdan məhrum edilib. Onunla yanaşı daha 6 vəzifəli şəxsə də hökm oxunub. Onlara 6 ildən 8 il 6 aya qədər həbs cəzası verilib.
