Kolumbiyalı jurnalist Roberto Trobaxo Azərbaycan şairi və mütəfəkkiri Nizami Gəncəvinin 880 illiyi münasibətilə “LaOtraCara” xəbər portalında “Böyük Nizami Gəncəvi – bəşəriyyətin nəhəngi” başlığı ilə dekabrın 29-da məqalə dərc edib.
Məqalədə ilk öncə, şairin həyatı və anadan olduğu Gəncə şəhəri barədə məlumat verilib. Həmçinin Nizami Gəncəvinin 20 minə qədər nəzm nümunəsi yaratdığı və YUNESKO tərəfindən dünya ədəbiyyatı və mədəniyyətinin ən parlaq simalarından biri kimi qəbul edildiyi vurğulanıb.
Jurnalist məqalədə “Xəmsə”yə daxil olan poemaların bugün də dünya ədəbiyyatında öz təsirini qoruyub saxladığını qeyd edib.
Nizami Gəncəvi 1141-ci ildə Gəncə şəhərində anadan olub. O, dünya ədəbiyyatında ilk şəkilli bədii yaradıcılıq nümunəsini, “Xəmsə”ni yaradıb. “Xəmsə”yə şairin “Sirlər xəzinəsi”, “Xosrov və Şirin”, “Leyli və Məcnun”, “Yeddi gözəl” və “İsgəndərnamə” poemaları daxildir. Bu əsərlərdən başqa Nizami Gəncəvi altı qəsidəni, 116 qəzəli, iki qitəni və 30 rübaini qələmə alıb.
Azərbaycanda 2021-ci il “Nizami Gəncəvi ili” elan edilib.
