Vətən müharibəsi iştirakçısı sosial vəziyyəti ilə bağlı çətinlik çəkdiyini deyir. 3-cü qrup əlil olan Şərur rayonu, Danyeri kənd sakini Bəhruz İbrahimov müavinət və prezident təqaüdü ilə təmin edildiyini bildirir. Lakin səhhəti işləməyinə icazə vermədiyi üçün əlavə qazanc yeri tapa bilmir.
“Qafqazinfo”ya müraciət edən B.İbrahimovun sözlərinə görə, iki azyaşlı övladı var və ailənin yeganə təminatçısıdır: “Hazırda işsizəm, 11 500 AZN kredit borcum qalıb. Banklara və sosial dəstək fondlarına dəfələrlə müraciət etməyimə baxmayaraq, “pul yoxdur” cavabı alıram”.
37 yaşlı qazinin sözlərinə görə, 2015-ci ildən Naxçıvanda gizir kimi xidmət edib: “Günnüt əməliyyatı, 44 günlük Vətən müharibəsi və 2023-cü ilin Antiterror əməliyyatlarında iştirak etmişəm. İndi 942 manat əlilliklə bağlı müavinət, 400 manat isə prezident təqaüdü alıram. Lakin bu, heç nəyə bəs etmir. İki uşağım hazırlıqlara getməlidir, yeni tədris ili başlayır və bütün xərcləri çoxalır. Ailədə işləyənimiz yoxdur. Atam 2-ci qrup əlildir, anam da xəstədir. Üstəlik, bu kredit də hər ay ödənməlidir. Daha öncə Naxçıvan Muxtar Respublikasının Əmək və Əhalinin Sosial Müdafiəsi Nazirliyində olmuşam və mənə 1000 manatlıq yardım ediblər ki, 3 aylıq kreditimi ödəyim. Bildirmişdilər ki, krediti bağlamağa da köməklik edəcəklər. Artıq 3 ay keçib. Mənim də imkanım yoxdur. Oradan da deyirlər ki, fondda pul yoxdur. Çarəsiz qalmışam”.
.jpg)
Məsələ ilə bağlı Naxçıvan Muxtar Respublikasının Əmək və Əhalinin Sosial Müdafiəsi Nazirliyinə sorğu ünvanladıq. Nazirlikdən müraciətimizə cavab olaraq bunu bildirdilər: “Vətən müharibəsi iştirakçısı Şərur rayonu, Danyeri kənd sakini İbrahimov Bəhruz Əli oğlu dövlət tərəfindən müvafiq dəstək tədbiri ilə əhatə olunub.
Belə ki, ona 2025-ci ildə orqanizmin funksiyalarının 35% pozulmasına görə Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar iki il müddətinə (30 iyun 2027-ci il tarixinədək) əlillik təyin edilib. Hazırda B.İbrahimova aylıq əsasda ümumilikdə 1342,75 manat (942,75 manat pensiya, 400 manat Prezident təqaüdü) sosial ödəniş həyata keçirilir.
Ona müharibə zamanı aldığı ağır xəsarətə və əlilliyə görə ümumilikdə 4400 manat manat məbləğində sığorta ödənişi edilib. Bundan başqa ona Naxçıvan MR-in “Dəstək” fondu tərəfindən 21 iyul 2025-ci ildə 1000 manat məbləğində maddi yardım edilib”.
Qeyd edilib ki, nazirliyin tabeliyində Dövlət Məşğulluq Agentliyinə daxil olmuş Şərur rayonu, Danyeri kənd sakini İbrahimov Bəhruz Əli oğlunun 07 iyun 2025-ci il tarixli işlə bağlı müraciətinə aidiyyəti üzrə baxılıb: “Müraciətin araşdırılması və dəqiqləşdirilməsi məqsədilə Agentliyin Şərur Rayon Sektorunun əməkdaşı tərəfindən B.İbrahimovla əlaqə saxlanılıb, vətəndaş işlə bağlı tələbinin olmadığını bildirərək sektora gəlməkdən imtina edib.
12 iyun 2025-ci il tarixində özünüməşğulluq proqramının “Broyler inkubatoru” zərfi üzrə müvafiq sistem üzərindən qeydiyyata alınıb. Vətəndaşın özünüməşğulluq proqramına cəlb olunmasına qanunamüvafiq baxılacaq”.
Qeyd edək ki, qazi Bəhruz İbrahimov “Füzulinin azad olunması”, “Cəbrayılın azad olunması”, “Qüsursuz xidmətə görə” III dərəcəli və “Vətən müharibəsi iştirakçısı” medalları ilə təltif olunub.
[gallery link="file" columns="1" size="full" ids="226867"]
