Ötən gün Azərbaycanın iki idmançısı və 3x3 basketbol millisi Fransanın paytaxtı Parisdə keçirilən Yay Olimpiya Oyunlarında çıxış ediblər. Bu barədə 2 avqust tarixində Report məlumat verib.
Yarışın növbəti günündə idmançılarımız aktivinə 2 medal birdən yazdırıblar.
Cüdo yarışlarında Hidayət Heydərovdan sonra Zelim Kotsoyev də Azərbaycan adına qızıl medal qazanıb. 100 kq çəki dərəcəsində mübarizə aparan tatami ustası finalda gürcüstanlı İlya Sulamanidzeyə qalib gəlməklə tarixi uğura imza atıb.
Növbəti medalı isə ölkəmizin aktivinə boksçu Alfonso Dominges yazdırıb. 92 kq çəki dərəcəsində çıxış edən dəri əlcək ustası qazaxıstanlı Aybek Oralbaya qalib gələrək yarımfinala adlayıb və bürünc medalı özü üçün təmin edib. Onun bu mərhələdəki rəqibi ispaniyalı Enmanuel Reyes Pla olacaq.
Ölkəmizi komanda yarışlarında təmsil edən qadınlardan ibarət 3x3 basketbol millisi üçün gün uğurlu keçməyib. İki oyuna çıxan basketbolçularımız əvvəlcə Fransa yığmasına 10:15, ardınca isə Almaniyaya 8:12 hesabı ilə məğlub olublar. Yığmamızın növbəti rəqibi sabah Avstraliya olacaq.
