Dünən, dekabrın 26-da Polşanın paytaxtı Varşava şəhərində şahmatın rapid və blits növləri üzrə dünya çempionatı start götürüb.
Sözügedən yarışda Azərbaycanı 12 şahmatçı təmsil edir. Kişilərin yarışında Şəhriyar Məmmədyarov, Rauf Məmmədov, Vasif Durarbəyli, Məhəmməd Muradlı, Aydın Süleymanlı, Vüqar Əsədli və Xəzər Babazadə, qadınların yarışında isə Gülnar Məmmədova, Zeynəb və Türkan Məmmədyarova bacıları Xanım Balacayeva və Gövhər Beydullayeva öz güclərini sınayır.
İlk 5 turun nəticəsində kişilərin yarışında ən yüksək nəticəni 3,5 xal toplayan Şəhriyar Məmmədyarov və Vasif Durarbəyli əldə edib. Şahmatçılarımız müvafiq olaraq 26 və 39-cu yerlərdə qərarlaşıblar.
Qadınlarda isə Zeynəb Məmmədyarova 3 xalla 14-cü yerdədir.
500 min dollar ümumi uduş fondu olan dünya çempionatında 3 gün rapid, 2 gün isə blits oyunları keçiriləcək. Turnirə dekabrın 30-da yekun vurulacaq.
