Tbilisidə təsadüf nəticəsində şuşalı general Əmir Kazım Mirzə Qacara məxsus tarixi bina aşkar edilib.
Gürcüstanın paytaxtı Tbilisidə keçirilən Caz Festivalı çərçivəsində təşkil olunan fotosərgiyə qatılmaq üçün şəhərin mərkəzində yerləşən bara gələn azərbaycanlı ziyarətçi maraqlı bir təsadüflə üzləşib. Caz barın bağlı olması səbəbi ilə Erekle Tatişvili küçəsi boyunca irəliləyən ziyarətçi, 14 nömrəli ünvanda yerləşən qeyri-adi memarlığa malik bina ilə rastlaşıb.
“Google Lens” vasitəsilə aparılan axtarış nəticəsində məlum olub ki, 1905-ci ildə inşa edilən bu bina Şuşa şəhərindən olan general-mayor, Azərbaycan Xalq Cümhuriyyətinin hərbi xadimi Əmir Kazım Mirzə Qacara məxsus olub. Tədqiqatlar göstərir ki, bina vaxtilə “Gəlir evi” funksiyasını daşıyıb və bu günə qədər yaşayış məqsədilə istifadə olunur.
Əmir Kazım Mirzə Qacarın həm Tbilisidə, həm də Azərbaycanın müxtəlif bölgələrində maarifçilik və xeyriyyəçilik fəaliyyəti ilə məşğul olduğu, o cümlədən 1912-ci ildə Tiflisdə Azərbaycan dram cəmiyyətinin yaradılmasında iştirak etdiyi tarixi mənbələrdə qeyd olunur. Onun həyat yoldaşı Gövhər Qacar isə “Qafqaz Müsəlman Qadınları Xeyriyyə Cəmiyyəti”nin təsisçilərindən biri olub.
Ən maraqlı təsadüflərdən biri də odur ki, binanın aşkarlandığı gün – mayın 1-i general Əmir Kazım Mirzə Qacarın doğum günü olub. Bu il onun anadan olmasının 172 ili tamam olur.
Hazırda binanın üzərində memorial lövhə və ya mədəni irs statusunu bildirən hər hansı qeyd yoxdur. Gürcü mənbələrində yayımlanan son məlumatlara görə, binanın tarixçəsi və sahibinin kimliyi ilə bağlı son illərdə maraq artıb.
[gallery size="full" ids="222724,222723,222722,222720,222719,222718,222717,222716,222715,222714,222713,222712,222711,222710,222709,222708,222707,222706,222705"]
