Milli Məclisin Mədəniyyət Komitəsinin sədri deputat Qənirə Paşayeva ötən gecə müalicə olunduğu Mərkəzi Klinik Xəstəxananın reanimasiya şöbəsində vəfat edib. Bu barədə 29 sentyabr tarixində İnsanoid xəbər verir.
Deputat dünən müalicə olunduğu Mərkəzi Klinik Xəstəxananın reanimasiya şöbəsində dünyasını dəyişib.
Milli Məclisin deputatı Qənirə Paşayeva ilə vida mərasimi bu gün saat 10-da Heydər Məscidində olacaq. Deputatın dəfn mərasimi İkinci Fəxri xiyabanda baş tutacaq.
Qeyd edək ki, Millət vəkili səhhətində yaranmış ciddi problemlərlə əlaqədar sentyabrın 23-dən Mərkəzi Klinik Xəstəxananın reanimasiya şöbəsinə yerləşdirilmişdir.
Naməlum mənşəli hipotonik vəziyyət diaqnozu qoyulan Qənirə Paşayevanın səhhətindəki kritik durumla əlaqədar Mərkəzi Klinik Xəstəxananın həkim personalı və Türkiyədən cəlb edilmiş həkim mütəxəssislər tərəfindən görülmüş bütün zəruri tədbirlərə baxmayaraq, millət vəkilinin həyatını xilas etmək mümkün olmayıb.
Qənirə Ələsgər qızı Paşayeva 1975-ci il martın 24-də Tovuz rayonunun Düz Qırıqlı kəndində anadan olub. Azərbaycan Dövlət Tibb Universitetinin Pediatriya fakültəsini və Bakı Dövlət Universitetinin Beynəlxalq hüquq fakültəsini bitirib.
Siyasi elmlər üzrə fəlsəfə doktoru professor olan Qənirə Paşayeva uzun illər media sahəsində fəaliyyət göstərib.
