Dekabrın 13-də Şuşada “Qarabağı qoru” şuarı altında kütləvi ağacəkmə aksiyası keçirilib. Bu barədə IDEA İctimai Birliyindən məlumat verilib.
Layihədə iştirak edən 60 gənc ekoloq ərazinin radiasiya fonu və hava keyfiyyəti üzrə ölçmə işlərini aparıb, eləcə də su və torpaq nümunələrinin götürülməsində iştirak ediblər.
Şuşa ilə yanaşı, gənclər, həmçinin Cəbrayıl, Füzuli, Qubadlı, Xocavənd, Zəngilan və Ağdam rayonlarına səfər ediblər.
Qarabağ və onun ətrafındakı rayonların Ermənistan tərəfindən 30 illik işğalı nəticəsində təbiətə ciddi ziyan vurulmuşdur. Ərazilərin yandırılması, su resurslarının çirkləndirilməsi, meşələrin, təbiət abidələrinin və ümumiyyətlə yeraltı və yerüstü təbii sərvətlərin talan edilməsi nəticəsində regionun ekoloji tarazlığı pozulmuşdur.
“Gənclərin Azərbaycanın işğaldan azad olunmuş ərazilərinin ekoloji qiymətləndirilməsində iştirakı” layihəsi IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilir.
[URIS id=16825]
