Qax şəhərində Heydər Əliyev Fondunun inşa etdiyi məktəbin açılış mərasimi olub. Bu barədə Report 16 sentyabr tarixində xəbər verib.
Vaqif Əliyev adına 3 saylı tam orta məktəb 1950-ci ildə inşa olunduğundan istifadəyə yararsız vəziyyətdə idi.
Təmir işləri artıq yekunlaşıb və təhsil ocağı yeni tədris ilində şagird və müəllimlərin ixtiyarına verilib.
Məktəbin açılış mərasimində Qax Rayon İcra Hakimiyyətinin başçısı Musa Şəkiliyev, Heydər Əliyev Fondunun nümayəndəsi Elvin Aslanov, Elm və Təhsil Nazirliyinin nümayəndəsi İlahə Rəsulova, həmçinin məktəbin kollektivi iştirak ediblər.
Üç mərtəbə və üç korpusdan ibarət olan təhsil müəssisəsi 320 şagird yerlikdir. Məktəbdə yaradılan 14 sinif otağı, fizika, kimya, biologiya laboratoriyaları, informatika, hərbi təlim, qızlar və oğlanlar üçün əmək təlimi otaqları, kitabxana, yeməkxana, akt zalı və idman zalları zəruri mebel və avadanlıqlarla, əyani vəsaitlərlə tam təchiz edilib. Təhsil müəssisəsində açıq idman meydançası da qurulub.
Məktəbin həyətyanı ərazisində abadlıq və yaşıllaşdırma işləri görülüb.
[caption id="attachment_130399" align="alignnone" width="696"]
Foto Report.az saytı[/caption]
