Qaxda ərlə arvad arasında dava olub.
İnsanoid.com-un əldə etdiyi məlumata görə, hadisənin istintaqı Qax RayonMəhkəməsində keçirilib.
Belə ki, təqsirləndirilən Sahib Əfəndiyev (ad şərtidir) həyat yoldaşı Sevda Əfəndiyeva (ad şərtidir) ilə birlikdə Qax şəhərində yaşayır. Cari ilin yanvarın 25-də onlar arasında münaqişə yaranıb. Buna səbəb Sevdanın onun nömrəsini əngəl siyahısına atması olub. Aralarında yaranmış mübahisə zamanı Sahib həyat yoldaşının qarnına təpik vurduqdan sonra başını divara çırpıb.
Sahib Əfəndiyev Azərbaycan Respublikası CM-nin 128-ci (sağlamlığa zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Sahib Əfəndiyev ona qarşı irəli sürülən ittiham üzrə özünü təqsirli bilib. O ifadəsində göstərib ki, Sevda ilə 13 ildir evlidir:
“Hadisə günü telefonla danışarkən Sevdadan sosial yardımla bağlı söz soruşdum. O, mənə sərt reaksiya verib, telefondakı adamın yanında biabır etdi. Bunun səbəbini soruşduqda üstümə qışqırdığı üçün onu döydüm. Törətdiyiməməldən peşmanam”.
Məhkəmə iclasında zərərçəkmiş Sevda Əfəndiyeva eyniməzmunlu ifadə verib:
“Hamamda paltar yuyan zaman Sahib telefonla danışa-danışa içəri girib sosial yardımla bağlı suallar verdi. Boşanma ərəfəsində olduğumuz üçün soruşduğu sualın cavabının mümkünsüz olduğunudedim. O, çölə çıxıb telefonla danışdıqdan sonra yanıma qayıdıb nömrəsini blok siyahısından çıxarmağımı istədi. Mən də çıxarmayacağımı dedim. Bu səbəbdən mübahisə yarandı. Başımı divara vurub, qarnımı təpiklədi”.
Tərəflər arasında barışıq əldə edildiyi və şikayətin olmadığı üçün Sahib Əfəndiyev məsuliyyətdən azad edilib.
Fidan İlqar
