Qubadlı və Zəngilanda Birinci Qarabağ müharibəsində itkin düşmüş şəxslərə məxsus olması ehtimal edilən meyit qalıqları aşkarlanıb. Bu barədə 11 sentyabr tarixində Report Hərbi Prokurorluğa istinadən xəbər verir.
Qubadlı rayonunun Məlikəhmədli kəndində və Zəngilan rayonunun Vejnəli kəndində Birinci Qarabağ müharibəsi dövründə itkin düşmüş şəxslərə məxsus olması ehtimal edilənn insan meyitinin qalıqları ekshumasiya edilib.
Həmin meyit qalıqları ilə bağlı məhkəmə-tibbi kriminalistik və məhkəmə molekulyar-genetik ekspertizaları təyin edilərək icraya yönəldilib və digər zəruri hərəkətlər yerinə yetirilib.
Ermənistanın silahlı qüvvələri və qanunsuz erməni silahlı birləşmələri tərəfindən xalqımıza qarşı törədilmiş sülh və insanlıq əleyhinə olan, müharibə, terrorçuluq, qəsdən adam öldürmə və digər cinayət faktları ilə bağlı Azərbaycan Respublikasının Hərbi Prokurorluğunda Cinayət Məcəlləsinin “Soyqırım”, “Əhalini deportasiya etmə və ya məcburi köçürmə”, “Milli, irqi, dini ədavət və ya düşmənçilik niyyəti ilə qəsdən adam öldürmə” və digər maddələri ilə istintaq olunan cinayət işi üzrə istintaq-əməliyyat tədbirləri davam etdirilir.
“Qanunvericiliyin və beynəlxalq hüququn hamılıqla qəbul edilmiş norma və prinsiplərinin tələblərinə uyğun olaraq, bütün tədbirlərin görülməsi təmin ediləcək", - açıqlamada bildirilib.
