Dekabrın 4-də Rusiyanın “NTV” telekanalının "Поедем, поедим!" səyahət proqramı Azərbaycan haqqında buraxılış hazırlayıb. Bu barədə 6 dekabr tarixində Dövlət Turizm Agentliyi məlumat verib.
Proqramın aparıcısı Federiko Arnaldi "Alov qüllələri" kompleksi, Heydər Əliyev Mərkəzi, “Baku Crystal Hall”, “Dəniz Mall”, Milli Xalça Muzeyi və “Kiçik Venesiya” şəhərciyinin arxitekturası ilə izləyicilərini tanış edib. O, həmçinin qeyd edib ki, ultramüasir görüntüsünə baxmayaraq, Bakı şəhəri özündə xalqın mədəni irsi və tarixi elementlərini əks etdirir.
Verilişdə Azərbaycanın milli mətbəxinə və çay mədəniyyətinə xüsusi yer ayrılıb.
Bakı ilə birgə Federiko Arnaldi Lənkəranda da olub. O, Lənkərandakı "Sitrus bağları"na baş çəkib və yerli mətbəxlə tanış olub.
Proqram “NTV” telekanalının 14 milyondan çox izləyicisi olan rəsmi “Youtube” kanalında yerləşdirilib.
