Azərbaycanda aqrar sığorta vasitəsilə sığortalanan bitki və heyvan növlərinin sayı artırılıb. Bu barədə 23 dekabrda Kənd Təsərrüfatı Nazirliyinin saytında məlumat verilib.
Belə ki, dövlət dəstəyi ilə sığortalanan bitki növlərinin sayı 14-dən 41-ə qaldırılıb. Mövcud siyahıya günəbaxan, noxud, alça, alma, çiyələk, xurma, nar, yemiş, pomidor və digər bitkilər əlavə olunub.
Sığortalanan heyvanların siyahısı da genişlənib. Bundan sonra südlük inək və camışlarla yanaşı qoyun, keçi və danalar da sığortalana biləcəklər.
Həmçinin sığorta risklərinin siyahısı da genişləndirilib. Sel və subasma, leysan, ildırım, donvurma, normadan artıq qar yağıntısı, heyvanların kimyəvi maddələrin təsirindən zəhərlənmə faktları sığorta üzrə təminat verilən risklərin tərkibinə daxil edilib.
Qeyd edək ki, sığorta haqqının 50%-i fermerlərə dəstək məqsədilə dövlət tərəfindən ödənilir.
