İranla sərhəddə narkotik dövriyyəsində şübhəli bilinən şəxslər saxlanılıb. 8 kiloqramdan çox narkotik müsadirə edilib. Bu barədə məlumat dekabrın 24-də Dövlət Sərhəd Xidmətinin saytında yerləşdirilib.
Hadisə dekabrın 23-də saat 03:10 radələrində İmişli rayonunun Qaragüvəndikli kəndi yaxınlığında baş verib. “Nissan Maxima” markalı avtomobil əraziyə yaxınlaşıb və nəqliyyat vasitəsindən 2 şəxs düşüb. Onlar sərhədçilərin “Dayan” əmrinə tabe olmayaraq, ərazidən bağlama götürüb qaçmağa cəhd edərkən saxlanılıblar.
Sözügedən şəxslərin üzərlərinə keçirilən baxış zamanı bir ədəd bağlamanın içərisində 8 kiloqram 300 qram narkotik aşkar edilib. Avtomobildən isə xırda bükümdə marixuana tapılıb.
Faktla bağlı araşdırma davam etdirilir.
Azərbaycanda cari ilin 11 ayı ərzində narkotik vasitələrin qanunsuz dövriyyəsi ilə bağlı 8095 cinayət faktı aşkarlanıb. Ümumilikdə 6,5 ton narkotik müsadirə olunub.
