Noyabrın 24-də Suriyanın Cerablus şəhərindəki Amerna düşərgəsində saxlanılan 12 Azərbaycan vətəndaşı ölkəyə gətirilib. Bu haqda Xarici İşlər Nazirliyi məlumat yayıb.
Bildirilir ki, öncə onların Türkiyəyə keçidi təmin olunub. Daha sonra qeyd olunan vətəndaşlar Ankara-Bakı reysi ilə Azərbaycana repatriasiya olunublar.
“Azərbaycan hökuməti sözügedən şəxslərin reabilitasiyası və reinteqrasiyası üçün bütün lazımi tədbirlərin görülməsini nəzərdə tutur”, - deyə məlumatda vurğulanır.
Gətirilənlərin şəxsiyyəti və həmin ölkədə olma səbəbləri haqqında hər hansı bir məlumat açıqlanmır.
Bundan əvvəl, oktyabrın 28-də İraqda cəzaçəkmə müəssisələri və uşaq evlərində saxlanılan 38 azyaşlı ölkəmizə təhvil verilmişdir. Son illər 100-dən çox şəxs Suriya və İraqdakı düşərgələrdən, təcridxanalardan ölkəmizə gətirilmişdir.
