Təhsil tələbə kreditini kimlər ala biləcək?

Bu gündən ölkədə təhsil tələbə krediti (TTK) sistemi açıq elan edilir. Bu haqda təhsil nazirinin müavini İdris İsayev noyabrın 25-də keçirilən brifinqdə məlumat verib. Həmçinin TTK-dan kimlərin yararlanacağı açıqlanıb.

TTK-nı almaq üçün tələbə əyani formada oxumalıdır və onun akademik borcu olmamalıdır. Kredit sistemi yalnız Azərbaycan vətəndaşlarına verilir.

İlk semestrdə TTK-nı qəbul imtahanında bakalavriat səviyyəsi üçün 300-700 bal, magistratura səviyyəsi üçün 50-100 bal, subbakalavriat səviyyəsi üçün 110-300 bal toplayanlar ala bilərlər.

Nazirliyin rəsmisi kreditin faizlərindən də bəhs edib: “Bu faizlər sosial təhsil tələbə krediti üzrə illik 2%, standart təhsil tələbə krediti üzrə isə 6% təşkil edir”. O qeyd edib ki, TTK uzunmüddətlidir, təhsil müddətində tələbədən geri tələb edilmir və faiz hesablanmır.

Təhsil dövründən sonra iki illik möhlət verilir ki, həmin tələbə əmək bazarına keçid etsin. Aşağıdakı hallarda kredit müqaviləsinin müddəti uzadılır:

1. yuxarı təhsil səviyyəsində əyani təhsil;


2. həqiqi hərbi xidmət;


3. məhkumluq (4 ildən çox olmayaraq azadlıqdan məhrum etmə və ya azadlığın məhdudlaşdırılması);


4. işləyən borcalanın hamiləliyə, doğuma görə və uşağın 3 yaşı tamam olana qədər ona qulluq etməkdən ötrü ödənişli sosial məzuniyyətdə olduğu müddət;


5. sağlamlıq imkanı məhdud 18 yaşadək uşaqlara və birinci dərəcəli əlilliyi olan şəxslərə qulluqda olan müddət.

Azərbaycanda 146 min 373 tələbə ödənişli əsasla təhsil alır. Onlardan krediti almaq hüququ olanların sayı 56 208 təşkil edir.