Azərbaycan qanunvericiliyinə əsasən, uşağın anadan olmasına görə 200 manat məbləğində birdəfəlik müavinət müəyyənləşdirilib. Bəs bu müavinəti necə əldə etmək olar? Məsələ ilə bağlı 24 noyabrda Xəzər Xəbər reportaj hazırlayıb.
Dövlət Sosial Müdafiə Fondunun (DSMF) mətbuat katibi Rəşad Mehdili bildirib ki, uşağın anadan olmasına görə birdəfəlik müavinəti həm işləyən, həm də işləməyən valideynlər ala bilər: “Hər iki valideyn işləmədikdə hər hansı sənəd təqdim etmədən uşağın anadan olmasına görə birdəfəlik müavinət avtomatik təyin olunur. Valideynlərdən biri işlədiyi halda isə, işləyən valideyn zəruri sənədləri iş yerinə təqdim edir və işlədiyi müəssisə onları Nazirliyə göndərir”.
Mətbuat katibinin sözlərinə görə, müavinətin ödənilməsi 5 iş günü ərzində təmin olunur və işləyən valideynin adına olan mobil telefon nömrəsinə bu barədə sms məlumat göndərilir.
“Valideynlər şəxsiyyəti təsdiq edən sənədlə istənilən Kapital Bank filialına yaxınlaşıb uşağın anadan olmasına görə birdəfəlik müavinəti ala bilər”, - deyə Rəşad Mehdili əlavə edib.
Həmçinin o bildirib ki, hər iki valideyn işləmədiyi halda birdəfəlik müavinət Azərpoçt MMC vasitəsilə verilir.
Məsələ ilə bağlı əlavə məlumat almaq üçün DSMF-in çağrı mərkəzinə (012) 562 20 11 zəng etmək olar.
