Hazırda Azərbaycanda ən çox müzakirə olunan mövzulardan biri pensiya ilə bağlıdır. İnsanları əsas maraqlandıran suallardan biri isə yüksək təqaüd almaq üçün nə etmək lazım olmasıdır. Bu barədə 24 noyabr tarixində APA Telegram kanalında reportaj paylaşıb.
Mütəxəssislərin sözlərinə görə, pensiya insanların əmək qabiliyyətli dövrdə göstərdikləri əmək fəaliyyətindən asılı olaraq təyin edilir. Pensiya məbləği fərdi hesabda toplanan pensiya kapitalının 144 aya bölünməsi yolu ilə formalaşır.
İqtisadçıların fikrincə, təqaüdlərin az olması əməkhaqlarının az olması ilə bağlıdır. Vətandaşlar az əməkhaqqı almasalar da, işəgötürən tərəfindən əməkhaqları minimum əməkhaqqı səviyəsində qanuniləşir. Bu isə gələcəkdə pensiyanın az olmasına səbəb olur.
“Əməyin leqallaşdırılması sahibkarlar üçün əlavə xərc yaradır. Bu səbəbdən də onlar mümkün qədər əməyi illeqal təşkil etməyə çalışırlar”, - deyə iqtisadçı ekspert Rəşad Həsənov bildirib.
Onun sözlərinə görə, vətandaş gələcəkdə yüksək pensiya almaq üçün işlədiyi dövrdə yaxşı gəlir əldə etməlidir. Buna görə də insanlar özləri əməyin leqallaşdırılması istiqamətində daha təşəbbüskar olmalıdırlar.
