Bu gün Xudayar Yusifzadənin doğum günüdür. Bu barədə İnsanoid bu gün, 15 iyul tarixində xəbər verir.
Xudayar Müslüm oğlu Yusifzadə 1998-ci il iyulun 15-də Bərdə şəhərində anadan olub.
Vətən müharibəsində şəhid olan Dövlət Sərhəd Xidmətinin hərbi qulluqçusu Xudayar yaşasaydı, 26 yaşı olacaqdı.
O, Bərdədə orta təhsilini başa vurduqdan sonra hərbi xidmətə yollanır. Daha sonra isə müddətdən artıq həqiqi hərbi xidmət qulluqçusu kimi “gizir” rütbəsini alır və xidmətini davam etdirir.
Xudayar 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı əvvəlcə Füzuli rayonunda sərhəd məntəqəsində xidmət edib, daha sonra isə Cəbrayılın və Zəngilanın azadlığı uğrunda gedən döyüşlərdə savaşıb. O, oktyabrın 22-də Zəngilanın azadlığı uğrunda gedən döyüşlər zamanı Ağbənd istiqamətində şəhid olub.
Xudayarın müharibənin gedişatında hərbi əməliyyatlar zamanı ifa etdiyi “Vətən yaxşıdır” mahnısı dillər əzbərinə çevrilir. Hətta mahnının müəllifi xanəndə Əlibaba Məmmədov şəhidimizin xatirəsinə ehtiram əlaməti olaraq, “Xudayar təsnifi” adlandırılmasına xeyir-dua verib.
X. Yusifzadə Bərdə şəhərindəki Şəhidlər xiyabanında dəfn edilib.
O, Prezident İlham Əliyevin sərəncamları ilə ölümündən sonra "Vətən uğrunda" medalı, "Azərbaycan Bayrağı" ordeni və "Zəngilanın azad olunmasına görə" medalı ilə təltif edilib.
