Yeni ilin yaxınlaşması ilə əlaqədar Azərbaycanın regionlardakı hotellərində yerlərin artıq 70-80%-i bron edilib. Bu haqda 24 dekabr tarixində Azərbaycan Hotellər və Restoranlar Assosiasiyasının İdarə Heyətinin sədri Samir Dübəndiyə istinadən Report məlumat verib.
“Hotellərimizin müştəriləri əsasən ölkə vətəndaşlarıdır. Çünki, koronavirusa görə təyyarələrə biletlər əvvəlki vaxtlarla müqayisədə xeyli bahadır. Həmçinin Azərbaycana daxil olmaq üçün xüsusi prosedurlardan keçmək lazımdır”, - deyə Samir Dübəndi bildirib.
Onun sözlərinə görə, Yeni il şənliklərində iştirakın qiymətləri ötən illə müqayisədə 10-15% artıb. O bunu istehlak mallarının qiymətlərində olan yeksəlmə ilə əlaqələndirib: “Nəzərə almaq lazımdır ki, yeni il şənlikləri təkcə gecələmədən ibarət deyil. Banketlərin qiymətləri ərzaq məhsullarının qiymətlərinə bağlıdır”.
