Azərbaycanda media orqanlarının bir-birlərindən xəbər “oğurlaması”nın qarşısının necə alınacağı açıqlanıb. Bu, Milli Məclisin dekabrın 14-də keçirilən iclasında birinci oxunuşda müzakirəyə çıxarılan “Media haqqında” qanun layihəsində əksini tapıb.
Bildirilir ki, media subyektləri digərlərindən informasiyasını və proqramlarını istinad etməklə abunəlik və ya müqavilə əsasında istifadə edə bilər. Abunəlik və ya müqavilə olmadıqda isə götürülən informasiyanın yalnız üçdə birindən çox olmayan hissəsini istinad etməklə istifadəsinə icazə verilir.
Məhdudiyyətlər dövlət orqanları və informasiya agentlikləri tərəfindən yayılan məlumatlardan istifadə hallarına şamil edilməyəcək. Media subyektləri rəsmi məlumatların həqiqətə uyğun olub-olmamasına görə məsuliyyət daşımayacaq.
Qanuna görə, media subyektləri 4 kateqoriyaya bölünəcək – audiovizual, çap, onlayn və informasiya agentlikləri. Həmçinin layihəyə əsasən, media subyektinin saytında adı, VÖEN-i, domen adının sahibi, məsul redaktorun soyadı, adı və atasının adı, subyektin fəaliyyət göstərdiyi ünvan və əlaqə vasitələri göstərilməlidir. Bununla yanaşı, materialın ilk dəfə yayımlandığı tarix qeyd olunmalıdır. Media qurumu hər ay 20 gün ərzində gündəlik azı 20 kütləvi informasiya dərc etdikdə onun fəaliyyəti davamlı hesab olunur.
Qeyd edək ki, ağır cinayətlərə əvvəllər məhkum edilmiş, məhkumluğu ödənilməmiş və ya götürülməmiş, məhkəmə tərəfindən fəaliyyət qabiliyyəti olmayan şəxslər informasiya agentliyi yarada bilməyəcəklər. Siyasi partiyalar və dini qurumlar isə yalnız çap mediası təsis edə biləcək.
