Yol qəzası azyaşlı tərəfindən törədilərsə, kim cəzalanır?

Yol qəzasını törədən şəxsin yaşı 16-dan aşağıdırsa, həmin şəxsi cinayət və inzibati məsuliyyətə cəlb etmək olmur. Azyaşlı barəsində materiallar yetkinlik yaşına çatmayanlarla iş üzrə komissiyaya göndərilir. Bunu dekabrın 6-da nəqliyyat məsələləri üzrə ekspert, hüquqşünas Ərşad Hüseynov Trend-ə bildirib.

Ekspertin sözlərinə görə, sürücülük vəsiqəsi olmayan yeniyetmə qəza törədərsə, həmin şəxs aşağıdakı cinayət və inzibati xətalar məcəlləsi ilə məsuliyyətə cəlb oluna bilər:

• Cinayət Məcəlləsinin 263.1-ci “Avtomobil idarə edən şəxs tərəfindən yol hərəkəti və ya avtomobilin istismarı qaydalarının pozulması, ehtiyatsızlıqdan zərərçəkmiş şəxsin sağlamlığına zərər vurulmasına səbəb olduqda” maddəsi. Eyni zamanda, bu maddədə nəzərdə tutulmuş əməllər zərərçəkmişin ölümünə səbəb olduqda, və ya iki və daha çox şəxsin ölümünə səbəb olduqda cinayət məsuliyyətinə səbəb olur.


• İnzibati Xətalar Məcəlləsinin 332-ci “Nəqliyyat vasitəsini idarə etmək hüququ olmayan şəxs tərəfindən nəqliyyat vasitəsinin idarə edilməsi” maddəsi.

“Kimsə dünyasını dəyişibsə, xəsarət alıbsa, həmin adama və ya adamlara kompensasiya ödənilir. Belə hallarda kompensasiya ödənişini avtomobil sahibi ödəməlidir”, - deyə Ərşad Hüseynov vurğulayıb.

Dekabrın 5-də Gəncədə 16 yaşlı sürücü qəza törədib. O, piyadanı vurub, sonra idarəetməni itirərək ağaca çırpılıb. Nəticədə sürücü və piyada dünyasını dəyişib, daha 3 nəfər isə xəsarət alıb.