İyunun 4-də Azərbaycan Kibertəhlükəsizlik Təşkilatları Assosiasiyasının təşkilatçılığı və Dövlət Təhlükəsizliyi Xidmətinin Milli Kibertəhlükəsizlik Mərkəzinin baş tərəfdaşlığı ilə Bakıda IV Milli Kibertəhlükəsizlik Forumu öz işinə başlayacaq.
İnsanoid.com xəbər verir ki, ölkənin ən nüfuzlu kibertəhlükəsizlik platformalarından birinə çevrilmiş bu forum dövlət strukturlarını, özəl sektorun təmsilçilərini, beynəlxalq partnyorları, texnologiya şirkətlərini və sahə mütəxəssislərini bir məkanda cəmləyərək kibertəhlükəsizlik sahəsindəki müasir çağırışların və gələcəyə dair perspektivlərin müzakirəsi üçün əhəmiyyətli əməkdaşlıq platforması yaradacaq.
Forumun başlıca hədəfi Azərbaycanda milli kibertəhlükəsizlik ekosisteminin inkişafına dəstək olmaq, dövlət və özəl sektor arasında tərəfdaşlıq əlaqələrini möhkəmləndirmək, həmçinin beynəlxalq təcrübənin və innovativ metodların mübadiləsini stimullaşdırmaqdır.
Tədbir zamanı kibertəhlükəsizlik sahəsində tanınmış beynəlxalq mütəxəssislərin, qabaqcıl qlobal İT və texnologiya şirkətlərinin rəhbərlərinin çıxışları planlaşdırılır. Forum çərçivəsində rəqəmsal transformasiya prosesində meydana çıxan yeni kiber təhdidlər, süni intellekt texnologiyalarının kibertəhlükəsizliyə göstərdiyi təsir, kritik infrastrukturun müdafiəsi, regional əməkdaşlıq perspektivləri və kibermüdafiə sahəsində çağdaş yanaşmalar geniş şəkildə müzakirəyə çıxarılacaq.
Eyni zamanda, forum daxilində reallaşdırılacaq panel sessiyaları və təqdimatlar zamanı aşağıdakı mövzular ətrafında fikir mübadiləsi həyata keçiriləcək:
Forum iştirakçıları üçün xüsusi sərgi məkanı da nəzərdə tutulub. Bu sərgidə kibertəhlükəsizlik sahəsində çalışan yerli və xarici şirkətlər öz məhsullarını, xidmətlərini, yenilikçi texnologiyalarını və startap layihələrini təqdim edəcəklər.
IV Milli Kibertəhlükəsizlik Forumunun ölkədə kibertəhlükəsizlik istiqamətində əməkdaşlığın dərinləşməsinə, bilik və təcrübə paylaşımının artırılmasına, eləcə də rəqəmsal təhlükəsizlik sahəsində yeni təşəbbüslərin irəli sürülməsinə ciddi töhfə verəcəyi proqnozlaşdırılır.
"Report İnformasiya Agentliyi" forumun media partnyorudur.
Forum barədə əlavə məlumatı www.cyberforum.az veb-saytından almaq mümkündür.
