22 iyul 1875-ci ildə publisist Həsən bəy Zərdabinin nəşr etdirdiyi "Əkinçi" qəzeti ilə Azərbaycan milli mətbuatının təməli qoyulub.
Qəzet cəmiyyəti düşündürən problemləri, dövrün ideyalarını özündə əks etdirib, xalqın maariflənməsində, milli və bəşəri dəyərlərin təbliğində mühüm rol oynayıb. "Əkinçi" qəzetinin 22 iyul 1875-ci ildən 29 sentyabr 1877-ci ilədək yalnız 56 sayı çap edilib. Qəzetin iki il sonra bağlanması Rusiya-Türkiyə müharibəsinin başlanması və qəzetin siyasi mövzulara toxunması ilə bağlıdır. Buna baxmayaraq, qəzet həm ziyalı, həm də sadə insanlar arasında məşhur olub.
XX əsrin əvvəllərində kütləvi informasiya vasitələrinin (KİV) Azərbaycan xalqının siyasi və ideoloji fəallığının artırılmasında böyük rolu olub. Həmin zaman tanınmışlardan "Şərqi-rus", "Həyat", "Füyuzat", "Təzə həyat", "Şəlalə", "Açıq söz", "Dirilik" qəzetlərini qeyd etmək olar. Sovet hakimiyyəti dövründə kommunist ideologiyasının güclü təsirinin olmasına baxmayaraq, Azərbaycan mətbuatı milli varlığını qoruyub saxlaya bilib.
5 iyul 1991-ci ildə Azərbaycanın ilk milli qəzeti olan "Əkinçi"-nin birinci nömrəsinin nəşr edildiyi gün – 22 İyul Azərbaycan Milli Mətbuat Günü elan edilib. 1998-ci ildə Ümummilli Lider Heydər Əliyev tərəfindən Azərbaycan mətbuatının üzərindən dövlət senzurasının ləğv edilməsi qərarı ilə dövlətdə söz və mətbuat azadlığının əsası qoyulub.
Azərbaycan müstəqillik əldə etdikdən sonra KİV-lərin sayında artım baş verib. Hazırda ölkədə 4200-dən artıq KİV mövcuddur.
