Əməkdar artist, bəstəkar-müğənni Elza Seyidcahan Modern.az-a bildirib ki, toy məclislərində bayağı və mənasız mahnıların çoxalması musiqi zövqünü korlayır:
"Toylarda üzr istəyirəm, yersiz, mənasız mahnıları "yeni mahnı" adı ilə camaata təqdim edib onların zövqünü korlamaq lazım deyil. Bizim elə mahnı kitablarımız var ki, orada bəstəkarların çox gözəl mahnıları yer alıb. Onları yeni aranjimanlarda oxusalar, çox gözəl səslənər".
"Bu gün mən baxıram ki, bizim bəstəkar mahnılarımız süni intellekt tərəfindən hazırlanır. Süni intellekt belə bizim bəstəkar mahnılarımızı sevə-sevə oxuyur. Amma bəzi özünü müğənni adlandırmaq istəyənlərin nə musiqi savadı var, nə auditoriya savadı".
Əməkdar artist toy mərasimlərindəki bəzi şou elementlərini də tənqid edib:
"Misal üçün, bəylə gəlin zala vağzal havası və ya Üzeyir Hacıbəylinin operettlarından birinin sədaları altında daxil olsa, açılış gözəl olar. Amma son dövrlər bu məsələdə ifrata qaçırlar. Qılınclarla, fişənglərlə, darambultu ilə. Sanki gəlin elə bil davaya gəlir. Oğuz elidir, gələcək burada kəsib-doğramağa".
"Mənə elə gəlir ki, toyun içində bu qədər ifrata qaçmaq insanları yorur".
