Bu gün Azərbaycan milli mətbuatının 151 yaşı tamam olur.
1875-ci il iyulun 22-də Həsən bəy Zərdabi "Əkinçi" qəzetini nəşr etməklə təkcə ilk milli mətbuat orqanının əsasını qoymadı. O, cəmiyyətin sözə, həqiqətə və maariflənməyə açılan qapısını araladı. Aradan bir əsrdən çox vaxt keçsə də, mətbuatın missiyası dəyişməyib. Dəyişən isə bu missiyanı daşıyan insanların sayı, peşələri və görünməyən zəhmətləridir.
Biz çox vaxt xəbəri yazanın adını görürük. Halbuki hər xəbərin, hər reportajın, hər yayımın arxasında görünməyən böyük bir komanda dayanır.
Kameranı çiynində saatlarla daşıyan operator, anı donduran fotomüxbir, gecəni monitora baxaraq keçirən videomontajçı, xəbərin vizual dilini quran qrafik dizayner, mətni cilalayan redaktor və korrektor, onu başqa dillərə daşıyan tərcüməçi, məlumatı toplayan və dəqiqləşdirən xəbər əməkdaşları, xəbəri sosial şəbəkələrdə milyonlarla insana çatdıran SMM mütəxəssisləri, saytın və yayımın bir an da dayanmasına imkan verməyən texniki heyət...
Onların əksəriyyətinin adı nə qəzet səhifəsində, nə saytın sonunda, nə də televiziya ekranında görünür. Amma əllərinin izi hər xəbərin, hər reportajın, hər yayımlanan görüntünün üzərində qalır.
Mətbuat təkcə yazanlardan ibarət deyil. Bu, görünən və görünməyən zəhmətlərin birgə yaratdığı böyük bir mexanizmdir.
Bu gün yalnız imzasını gördüklərimizi deyil, görünməyən əməyi ilə bu sahəni ayaqda saxlayan bütün media əməkdaşlarını təbrik edirik.
Milli Mətbuat Günümüz mübarək!
Emilya Tağıyeva
