Bakıda doğulmuş tanınmış rusiyalı stilist, teleaparıcı və moda eksperti Vladislav Lisovets Azərbaycanın Müstəqillik Günü münasibətilə sosial şəbəkələrdə duyğusal paylaşım edib.
Beləliklə, Lisovetsin doğma şəhərini 30 ildən çox əvvəl tərk etməsinə baxmayaraq, o, hələ də Azərbaycanla dərin emosional bağlılıq hiss etdiyini və buranı öz həyatının, eləcə də şəxsi tarixinin vacib bir hissəsi hesab etdiyini etiraf edib.
İnsanoid.com xəbər verir ki, bu paylaşımın edilməsinə səbəb isə Moskvada Azərbaycanın Müstəqillik Gününə həsr olunmuş tədbirin keçirilməsi olub. Teleaparıcı öz müraciətində Bakını, uşaqlıq atmosferini, milli mədəniyyəti və onilliklər keçməsinə rəğmən qəlbində qalan hissləri istiliklə yad edib:
"Dünən Moskvada Azərbaycanın müstəqillik günü münasibətilə keçirilən bayramda idim.
Və mən hələ də izah edə bilmirəm ki, doğulduğum yerə qarşı niyə bu qədər güclü, isti hisslər bəsləyirəm. Axı damarlarımda azərbaycanlı qanı yoxdur və Bakıdan 32 il əvvəl getmişəm, görünür, odlar yurdunun enerjisi məni saxlayır.
Həmçinin mən böyüdüyüm gözəl şəhərə və qazandığım mədəniyyətə görə minnətdaram.
Axı uşaqlıq sonrakı həyata böyük təsir bağışlayır; xeyr, hər şey rəvan olmayıb, amma mən yalnız günəşi və istiliyi xatırlayıram.
Hər dəfə musiqini eşidəndə və milli mətbəxin qoxusunu duyanda mən Bəxtəvərəm - Xoşbəxtəm! Ümumiyyətlə hesab edirəm ki, Vətəni sevmək və dəyərləndirmək xoşbəxt həyat üçün vacib amillərdən biridir.
Bütün həmyerlilərimi təbrik edirəm".
Bu paylaşım izləyicilər arasında səmimi reaksiyaya səbəb olub və onların bir çoxu Lisovetsə bu səmimi sözlərinə, Azərbaycana və onun mədəniyyətinə göstərdiyi hörmətə görə təşəkkür edib.
