ABŞ-də 13 yaşlı yeniyetmə 70 metrlik uçurumdan yıxılısa da, möcüzəvi şəkildə sağ qalıb. Xilas edildikdən dərhal sonra isə o, “Cola” istədiyini bildirib. Bu barədə "The Daily Mail" xəbər verir.
Məlumata görə, hadisə Missuri ştatında baş verib. Kadi adlı yeniyetmə skeytbordu ilə dostunun evinə gedərkən bir anda yoxa çıxıb. Valideynləri dərhal polisə müraciət edib. Onu axtarışları 3 gündən artıq davam edib və o, xidməti it tərəfindən tapılıb.
Məlum olub ki, yeniyetmə uçurumdan yıxılıb və günəşin altında, ağır xəsarətlərlə 3 gün orada qalıb. Ona beyin qanaxması, sətəlcəm və müxtəlif bədən xəsarətləri diaqnozu qoyulub. Yaralı helikopterlə uşaq xəstəxanasına çatdırılıb və süni tənəffüs aparatına qoşulub.
Bir neçə gün aparata bağlı qalan yeniyetmə daha sonra sağalmağa başlayıb. Gücünü toplayar-toplamaz isə həkimlərdən “Cola” istəyib. Onun arzusu təxminən bir saat sonra yerinə yetirilib. Hazırda Kadi fizioterapiya kursu keçir, lakin vəziyyəti hələ də ağır olaraq qalır.
