Azad edilən ərazilərdə mədəni-dini abidələrin, məscidlərin bərpasında yerli mütəxəssislərlə yanaşı, xarici ekspertlər də iştirak edirlər. Hazırda bu prosesə Avstriya, Böyük Britaniya, Bolqarıstan, İtaliya, Latviya, Rusiya, Türkiyə, Gürcüstan və digər ölkələrdən mütəxəssislər cəlb edilib. Bu barədə dekabrın 13-də Prezidentin köməkçisi Anar Ələkbərov açıqlama verib.
Onun sözlərinə əsasən, regionda mədəni irs abidələrinin bərpası üzrə layihə Heydər Əliyev Fondu tərəfindən başlanılıb. Layihənin icrası üçün xüsusi işçi qrupu yaradılıb və bərpa olunacaq abidələrin öyrənilməsi üçün ilkin qiymətləndirmə keçirilib.
“Bərpa işləri dini mənsubiyyətindən asılı olmayaraq bütün abidələri əhatə edir. Abidələrin yenidən qurulması zamanı onların ilkin simasının pozulmaması prinsipi əsas götürülür. Bununla bağlı beynəlxalq təcrübə öyrənilir”, - deyə Anar Ələkbərov vurğulayıb.
