2022-ci ilin yanvar-fevral aylarında pərakəndə ticarət şəbəkəsində istehlakçılara 7 milyard manatlıq mallar satılıb. Bu barədə məlumat Dövlət Statistika Komitəsinin 14 mart tarixli hesabatında əks olunub.
Məlumata əsasən, həmin pulların 3,9 milyard manatı ərzaq məhsulları, içkilər və tütün məmulatlarına, 3,1 milyard manatı qeyri-ərzaq mallarına xərclənilib. Ötən ilin yanvar-fevral ayları ilə müqayisədə pərakəndə ticarət dövriyyəsi real ifadədə 3% artıb.
Qeyd olunub ki, bu ilin yanvar-fevral ayları ərzində istehlakçılar aldıqları mallara xərclədiyi pulun 49,4%-ni ərzaq mallarının, 6%-ni içki və tütün məmulatlarının, 15,5%-ni toxuculuq məhsulları, geyim və ayaqqabıların, 5,2 %-ni avtomobil benzini və dizel yanacağının, 2,5%-ni əczaçılıq məhsulları və tibbi ləvazimatların, 15,3 %-ni isə digər qeyri-ərzaq mallarının alınmasına sərf ediblər.
Hesabat dövründə pərakəndə ticarət şəbəkəsində bir ölkə sakini orta hesabla ayda 346,2 manatlıq, o cümlədən 191,9 manatlıq ərzaq məhsulları, içkilər və tütün məmulatları, 154,3 manatlıq qeyri-ərzaq malları alıb.
