Dövlət Gömrük Komitəsinin yanında “Azərterminalkompleks” Birliyinin vəzifəli şəxslərinin qanunsuz hərəkətləri barədə cinayət işinin istintaqı tamamlanıb. Bu barədə yanvarın 8-də Baş Prokurorluq məlumat verib.
Daha öncə, 2020-ci ilin iyul ayında müvəqqəti saxlanc anbarlarının fəaliyyətinin təşkili üzrə Astara bölməsinin rəisi Etiqam Babayev Astara şöbəsinin inspektoru İsmətulla Tağıyev ilə əlbir olaraq vəzifə səlahiyyətlərini aşıb.
Onlar ayrı-ayrı vaxtlarda İran vətəndaşları tərəfindən gətirilən və müvəqqəti saxlanca qəbul edilən, dəyəri ümumilikdə 33 min 440 manat olan tibbi vasitələri qanunamüvafiq sənədləşmə aparılmadığı üçün geri qaytarmalı olduqları halda, bir hissəsinə saxta akt tərtib ediblər. Qalan hissəsini isə İsmətulla Tağıyev istifadə etmək üçün aktsız formada tanışına təhvil verib.
Etiqam Babayev “vəzifə səlahiyyətlərindən sui-istifadə” və “vəzifə saxtakarlığı” maddələri, İsmətulla Tağıyev isə “vəzifə səlahiyyətlərini aşma” və “vəzifə saxtakarlığına təhrik etmə” maddələri ilə ittiham olunurlar.
Cinayət işi baxılması üçün məhkəməyə göndərilib.
