2021-ci il ərzində aliment ödənilməməsi ilə bağlı Ailə, Qadın və Uşaq Problemləri üzrə Dövlət Komitəsinə 379 müraciət daxil olub. Bu haqda qurum dekabrın 22-də məlumat yayıb.
Ədliyyə Nazirliyinin rəsmisi Kəmalə Əhmədovanın sözlərinə əsasən, cari ilin 6 ayı ərzində təxminən 3 mindən çox şəxs aliment ödəmədiyi üçün axtarışa verilib. O vurğulayıb ki, aliment işlərinin icrasında çətinlik törədən nüanslardan biri borcluların xaricdə yaşamasıdır.
“Aliment işlərində uşaqların sayı 160 mindən çoxdur. 2009-cu ildə alimentlə bağlı icra sənədlərinin sayı 25 mindən çox idisə, son iki ildə 4 dəfəyə qədər artım olub. Son il yarım ərzində 130 milyon manatdan çox aliment tələbkarlara ödənilib”, - deyə qurumun əməkdaşı əlavə edib.
