Ağsu rayonunda qanunsuz odlu silah-sursat saxlayan və psixotrop maddələrin dövriyyəsi ilə məşğul olan şəxslərə qarşı əməliyyatlar keçirilib. Bu barədə 10 fevral tarixində Daxili İşlər Nazirliyi İnsanoid-ə məlumat verib.
Üzərində odlu silah-sursat gəzdirməkdə şübhəli bilinən Ağsu şəhər sakini, əvvəllər də narkotiklərin dövriyyəsi ilə məşğul olduğu üçün məhkum olunmuş Eldəniz Burcalıyev saxlanılıb. Onun üzərində daşıdığı bağlamaya baxış keçirilərkən 1 ədəd lüləsi və qundağı kəsilmiş tüfəng, eləcə də həmin silaha məxsus 5 patron aşkar edilərək götürülüb. E.Burcalıyev ifadəsində həmin silahı tapdığını və gizlətmək məqsədilə yaşadığı ünvandan başqa yerə aparmaq istədiyini bildirib.
Digər əməliyyat nəticəsində şəxsi axtarış zamanı Əli Novruzov adlı şəxsdən psixotrop maddə olan metamfetamin aşkarlanıb. O saxlanılıb.
Faktlarla bağlı cinayət işləri başlanıb.
