Cəlilabadda qəsdən adam öldürməyə cəhddə təqsirləndirilən şəxsin apellyasiya şikayəti təmin edilməyib. Bu barədə yanvarın 13-də Report məlumat yayıb.
Hadisə 2020-ci ilin iyul ayının 26-da baş verib. Uzuntəpə kənd sakini yaşadığı evdə həyat yoldaşını bıçaqlayıb.
Faktla bağlı “qəsdən sağlamlığa yüngül zərər vurma” maddəsi ilə cinayət işi başlanıb. Daha sonra isə əməldə “qəsdən adam öldürməyə cəhd” cinayətinin əlamətləri müəyyən edilib. Bu səbəbdən cinayətkarın ittiham olunduğu maddə dəyişdirilib.
Məhkəmənin hökmü ilə o, 7 il 10 ay 15 gün müddətinə azadlıqdan məhrum edilmişdir. Hökmdən narazı qalan məhkum apellyasiya şikayəti vermişdir.
Ölkədə 2021-ci ilin 9 ayı ərzində baş verən qəsdən adam öldürmə və adam öldürməyə cəhd cinayətləri nəticəsində 51 qadın həyatını itirib. Xəsarət alanların sayı isə 24 təşkil edib. Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
