2022-2023-cü tədris ili üçün “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı”nda tibb təhsili yer almayıb. Məsələyə aydınlıq gətirmək üçün aprelin 6-da Təhsil Nazirliyi açıqlama verib.
Qurumun rəsmisi Tural Əhmədov bildirib ki, proqramda tibb təhsili olmasa da, ictimai səhiyyə ixtisası var.
“Bu, səhiyyənin idarə edilməsini özündə ehtiva edən geniş bir sahədir. Buna ciddi ehtiyac var. Müvafiq qurumların rəyi əsasında bu, 15 ixtisasdan biri olaraq təsbit olunub”, - deyə o əlavə edib.
Qurumun müşaviri Nicat Məmmədlinin sözlərinə əsasən, bu, spesifik bir sahə olduğu üçün bir çox ölkələrdə tibb təhsilinin xüsusi təşkili forması var. Qeyd edilib ki, tibb təhsilinin bahalı olması qoyulan investisiyanın qaytarılması baxımından da ciddi problemlər yarada bilir: “Bununla bağlı böyük ehtimalla bu yaxınlarda elan edəcəyimiz ayrıca bir layihəmiz olacaq”.
