Malinin şimalında "Vaqner" qruplaşması və Mali silahlı qüvvələrinin muzdlu əsgərlərindən ibarət bir karvan qum fırtınası səbəbi ilə pusquya düşüb. Bu barədə İnsanoid BBC-yə istinadən bu gün, 29 iyul tarixində xəbər verir.
Tuareqlərin hücumü nəticəsində qruplaşma 20 nəfərdən 50 nəfərə qədər itki verib. Tuareqlər avtomobilləri və zirehli texnikaları ələ keçiriblər.
Hücum Əlcəzairlə sərhəddə yerləşən Tinzauaten şəhəri yaxınlığında baş verib.
Bir neçə texnika, həmçinin rus muzdluları qorumağa çalışan Mi-24 helikopteri vurulub.
Tuareqlər 100 ildən artıqdır müstəqil dövlət yaratmaq uğrunda müharibə aparan döyüşkən Afrika tayfalarından biridir. Uzun müddət əvvəl fransızlar Sahara səhrasındakı ərazilərini bir neçə koloniyaları: Mali, Niger, Mərakeş və Əlcəzair arasında bölüb. Demək olar ki, o vaxtdan bu tayfa öz dövlətçiliyinə nail olmağa çalışır.
Bununla belə, tuareqlər arasında radikal islamçılar da var. Belə ki, ilkin məlumatlara görə, Vaqner konvoyuna və Mali ordusunun əsgərlərinə edilən hücuma görə məsuliyyəti məhz Əl-Qaidə cihadçı qruplaşması öz üzərinə götürüb.
"Vaqner" ən azı 2021-ci ildən Malidədir və hökumət qüvvələrinin tərəfində döyüşür.
