Zəfər Günü münasibətilə 2021-ci ilin noyabrın 5-də elan edilən amnistiya aktı 17 267 şəxsə şamil olunub. Bu barədə martın 15-də Azərtac məlumat yayıb.
Amnistiyanın tətbiq olunduğu şəxslərdən 733-ü Vətən Müharibəsinin iştirakçısı, 837-si qadın, 65-i yetkinlik yaşına çatmayandır.
Amnistiya qərarı azadlıqdan məhrumetmə yerlərində cəza çəkən 5971 məhkuma tətbiq edilib. Onlardan 2710-u azadlıqdan məhrumetmə cəzasından azad olunub, qalanlarının cəza müddəti 6 ay azaldılıb.
Sözügedən amnistiya aktı tətbiq olunan şəxslərin sayına görə indiyədək qəbul edilmiş ən geniş amnistiyadır. Ümumilikdə 1995-ci ildən etibarən qəbul edilən 12 amnistiya aktı təxminən 135 min şəxsə tətbiq edilib, 32 mindən çox məhkum cəzaçəkmə müəssisələrindən azad olunub.
